Sesión 3. Terceru de Primaria

L'horru forma parte de la casa llabriega asturiana. Ye una construcción onde se guarden alimentos (patates, cebolles, nueces, maíz, quesu..), ropa o ferramientes.
Aguántase enriba cuatro pegollos, que tienen la finalidá de que los mures nun puedan esguilar y entrar na despensa. L'espaciu qu'hai debaxo llámase solhorru y aprovéchase pa guardar el carru.
L'horru pue desmontase y treslladase d'un sitiu pa otru.
Delles veces los horros tienen adornos tallaos o pintaos. Les partes que más se solíen decorar yeren el lliñu y les colondres.
Los horros asturianos pueden tener el teyáu de teya, de llábana o vexetal.

Dibuxa esti horru na llibreta, bien curiosín, como si fuere un cuadru, y asitia estes partes según correspuenda:



pegollu, muela, subidoria, teyáu, trabe, colondra, lliñu

Pa faclo pues consultar esta páxina y esta otra.

Visita d'Alfredo González

El pasáu vienres 12 de marzu visitó la nuestra escuela'l cantautor Alfredo González, ganador de la Meyor Canción n'asturianu del añu 2009 col tema "La nada y tú".

Facía bien de tiempu que veníemos sintiendo'l so discu en clase d'asturianu y teníemos munches ganes de conocelu personalmente. P'aprovechar la visita caún de los alumnes de quintu y sestu preparó una pregunta rellacionada cola so carrera profesional, colo que per un momentu convertímonos en periodistes profesionales. Amás, les rempuestes que nos dio'l cantautor asturianu van salir espublizaes, como si fuere una rueda de prensa de les de verdá, nel especial del periódicu escolar que saldrá con motivu de la Selmana de les Lletres.

Pa rematar, amás d'entrevistalu, dos de los nuestros compañeros (Darío y Nicolás) tuvieron la oportunidá d'interpretar dellos temes a la guitarra, detalle qu'Alfredo González contestó cola interpretación, pa nosotros n'esclusiva, del cantar que más nos presta "La nada y tú".

Equí dexamos unes cuantes semeyes de la "firma d'autógrafos" pa poder presumir en casa: